2006年12月26日 星期二

聖誕@2006 (上)



 

       聖誕o既來臨代表一年又快將過去.........

       平安夜晚上例牌地番partime(因為有工半,即係人工乘1.5),十一點半收工後,o係尖東百無聊賴地四處走,百周年紀念公園個邊好鬼多人,原來有表演兼夾有十幾個攤位賣野,行行下貢左入機鋪,打完兩鋪又出番黎,跟住行去金馬倫道個邊.............(一路行,一路收到朋友既SMS,想回覆,但send晤倒出去!)

       o係恆生隔離開左間廣視(widesight),播緊軟硬演唱會,悶悶地的我當然企定定睇番陣,等到我o既蛇頭(女)同佢阿哥(男)黎埋,一齊係附近搵間茶餐廳飲杯野,先至捨得閃.........o係條街行行下,同我蛇頭玩起上黎,仲一齊碌左落地......後黎又為左o的事嘈交,攪到嬲嬲地,自己一個番屋企........

        晤知係咪心情晤好,上左床竟然訓晤著!四點瞌埋眼,張開眼都只係五點,再瞌埋眼,再張開眼都只係六點......情況持續到朝早八點半,終於起身,搵o的野做下,決定出街食早餐!食完勒,都仲係好精神,怎辦好呢?

        又去機鋪打機,過左幾粒鐘番屋企,都仍然訓晤著,繼續疲勞攻勢--睇電視! 攪攪下終於有feel,可以訓番個覺咯.......    (待續)


2006年12月18日 星期一

短訊一則


好耐冇寫blog了.....真係好忙.........

戲都冇睇過一套,好驚俾人話out date..........

好開心天氣好涷,過聖誕都有feel一o的........

但冇執屋,尢其係間房,鬼咁多垃圾.......

早幾晚番partime,見到劉淖淇做MC,真人又幾索下,仲有份招呼佢,我簡直義無反顧啦........

可惜,曼聯輸波,仲係輸俾尾三既韋斯咸,點解咁遲至換星仔入黎??

 


2006年11月25日 星期六

有乜好食

                昨日餐lunch約左個同事出街吃飯,都係老地方--茶餐廳!

                 一坐低,望下掛起o既餐牌......叉旦飯......就叫叉旦飯啦,不過落單個時都問問個阿姐:「的旦邊度架?」「晤係大陸架,白旦黎架....」咁都冇咁驚,最後叫左肥叉炒旦飯(肥叉好食o的,雞蛋炒過好似穩陣o的)

                望住電視o既新聞報告,講緊周一嶽......諗諗下,鴨蛋有事,雞蛋又有事,多寶魚又有事,星班又有事,蠔又有事,桂花魚都好似話有事,究竟食乜先至係最安全??(定係香港人越黎越怕死)

                返到公司,仲係好多野做(放完假番工跟住會好忙似乎係一個千古不變既定律),到四點開始,對住個電腦Mon不停入單(機又慢、單又多),人越黎越疲倦,眼皮越黎越重,但工作仍是要繼續......

                為左解除疲勞,收工後即去打機減減壓咯~~~~


2006年11月23日 星期四

放假?

            22 + 23 號,自己放自己兩日假......

            假期係辛勞工作而換黎,應該好好休息、放鬆至係,但我覺得好忙碌.......

            21號晚開完partime,番到屋企沖完涼,食住燒夜睇番錄左既"賭場風雲",跟住開著電腦check下e-mail睇下blog......到三點九,上網睇歐聯直播~~些路迪對曼聯,完場差不多晨早六點,訓得幾粒鐘到十二點又起身食晏晝飯.....之後,睇一陣電視、咪下報紙已經係下晝四點幾,然後去洗頭沖涼,換埋衫就出門口,因為又要番partime.......(之後o既發展可以由呢段開首睇番,怕且都一樣)

            咁,究竟放假是甚麼??

 


2006年11月16日 星期四

篤背脊

     平心而論,自己甚少篤人背脊,俾人就多......

     又來一單......我下屬落柯打給採購部訂貨,原本星期一訂星期二來貨,但是沒有到,致電查問,原來採購部一整天也聯絡不到供應商(很難得才聽到的理由,亦要接受,但起碼早o的通知聲),之後我很好彩地一次就能聯絡到,跟進柯打之餘還要回覆採購部同事......

                    落了柯打,但貨趕不及到,用家(飲食部)當然炸晒型,一個晤該將責任推落我部門身上,開會o個時對住我上司又講幾句咁(出聲通常都係o的阿一阿二,口夠大o麻),後來我又要做野,向上司解畫(照例幾句攪掂,始終應付過晤少,有經驗),還要向餐廳、酒吧同事交待一下,呢個收貨主管都晤易做個喎......

      晚上,有位舊同事call,話左個消息俾我知,令我不期然要諗一諗~~


2006年11月13日 星期一

今天有風

            禽晚要番partime,但早左出門口,走左去尖東行一陣...........

             街上很大風,有點涼意,自己穿上了長袖衫,只覺得天氣已經轉變............

             而家十一月啦,應該係涼浸浸去到凍冰冰o既時間,越冷越好!

             晤係咁點分春夏秋冬?難道到聖誕節仲要見十九/二十度.......?

             會令人非常冇癮的,千祈晤好!!


2006年11月9日 星期四

ER


        我對呢套劇集都算最長情,到而家追左12季(雖然每季都一定錯失幾集,晤係要開工就係有o的事),就算有人話做左咁耐,有的悶,冇乜新意........我依然不離不棄

        雖然故事發生o係急証室,但晤止講生老病死,仲有愛情/感情/親情/友情,又會講生活/環境/政治/罪案,個範圍闊到你睇晤晒,總會令人有思想o既空間........

        可惜今輯阿John Carter走左,硬係覺得冇左個中心咁,話晒大家都差晤多靚仔.......


2006年11月4日 星期六

公司旅行



     11月2日,仲掛緊一號風球,但天氣又晤錯......

     九點正去到公司樓下集合,冇耐上左旅遊車,朝第一個目的地--濕地公園進發!

     自己係第一次黎(就係因為咁先至報名),感覺上幾現代化,同以前米埔有好大o既差別,既企理又乾淨,怕晒o既可以留係展覽館裡面(有冷氣又有互動遊戲玩),又可以出外睇下花草/雀鳥,仲可以探下陳鱷鱷(即係貝貝),但可能困得耐,攪到佢晤多願郁........

      最驚喜o既係入面有間大家樂,側邊連接玻璃可以飽覽風景,食物質素不俗,我試左個熱狗,飽有灴過醬料亦足,very good.......

       跟住到第二站--大棠荔枝山莊,時為中午,正是食晏之時,一行幾十人就o係處自助任食BBQ.

       o野食一盆盆拎出黎,都晤知擺左幾耐,o的丸仲係未解凍潻.......我燒左幾條腸,幾粒丸,一塊扒就收工,跟住走左過隔離,因為有同事帶左私伙野食--栗子+茄子+棉花糖等,最正都仲係o的雞肉串燒,跟埋沙爹汁,yummy.......

       食飽飽,的爛賭同事自不然就走出黎,咁岩我又帶左啤牌,玩三公喎~~~我都趁下熱鬧,玩左一陣,嬴左千零蚊就走咯.......

       出得o黎行,梗係要四圍行下,原來呢度又有野豬,又有羚羊,仲有鴕鳥,兼且有錦鯉.......餵魚都幾好玩,睇下的魚搶食魚糧,係個池塘跳黎跳去,好有生氣!!

       三點半,要回程,番屋企,有點倦,抖一陣,又出黎......

       約左個friend出朗豪坊睇七點半[世貿中心],以為係刺激動作片,其實係劇情片,令我感動得又流下幾行眼淚.......八十分!


2006年11月1日 星期三

煩煩煩

    好怕收到o的sell野o既電話,禽日又有一個.......

    係個女仔打黎,話多謝我之前做問卷調查(我都晤記得幾時做過),所以介紹一個理財計劃,仲要約出黎傾咁............

    已經忙緊做野,趕住埋數架啦,就算得閒都走去飲杯茶,抖一抖.........我不斷話自己晤o岩,又冇錢剩呢o的藉口去推,個女仔仲係死纏不休,攪到我話晏o的再約時間,先可以收線.........

    到佢下晝再打黎o個陣,我當然晤會咁苯,索性晤接!

    雖然覺得好煩,但諗下佢又冇得罪我,冇理由講一輪粗口鬧佢架.........

    點收科好呢??

 


2006年10月25日 星期三

今晚原來係乜水個細佬結婚

  10月24日,晴.

     收工後趕到去柏寧酒店番partime,27樓有宴會.......晤知係乜水個細佬結婚(佢剩係話多謝珊姐),主角並晤重要,但係的guess既陣容先至鼎盛......先有兩大經理人--Paco+Mani(好想走埋去講句:多謝Paco多謝Mani),仲有倪俊傑+滕麗明做兄弟姊妹,同埋單拖出席o既李珊珊,間晤中o係有線會見到o既吳文忻,加埋講馬又講波o既駱詠豪,到後來......連英皇阿楊生楊太+吳雨都黎(當然有保鑣跟住),真係誇張(睇o的人個個都"老闆""老闆"咁叫就知道楊生地位超然),再加上一班傳媒,好不熱鬧.......

     除左做野,我當然晤會放過昅女仔o既機會啦,呵呵~~~~~~~


2006年10月23日 星期一

睡覺

   好多時都冇足夠o既睡眠,日頭番工,夜晚番partime,番到屋企食下燒夜,再跟住睇場直播波,訓幾個鐘又要起身番工.............今日好o的,因為禽晚番完partime,跟住同o的friendo係旺角,一路食燒夜一路睇"雷丁VS阿仙奴",睇完已經係凌晨一點幾,但係"皇馬VS巴塞"三點至開波,中間呢段時間做乜好呢?

   同左兩個friend去機鋪(似乎係磨時間同等人既好去處),打左一陣機,另外一班friend話去左開房打麻雀,心諗:又o係室內,又有波睇,又晤駛俾錢(去茶餐廳都要收最低消費),速速過去會合............

   講番場波,"紅藍衫交俾白衫....""呢球龍門口幾碼都可以射上三樓...." 呢o的都晤係重點,反而係當皇馬三分鐘都晤駛就入第一球 "嘩!~~""呢球頂得靚....咦?魯爾?" 跟住成班人開始幫巴塞打氣,直至.....皇馬領先二比零 "都話皇馬對住強隊打高幾班....""話晒兩隊宿敵冇得保留,巴塞又踢得咁渣,抵輸啦~~" 大家一齊嗌,一齊傾,一齊講,一齊笑,成班朋友睇波之樂趣就在於此.

   時間係........晨早五點幾,又未有地鐵搭,唯有留低多一陣睇下o的friend[15/16打雀局],麻雀大俠曾經講過---牌品好,人品自然好,呢項國技亦係一種了解朋友o既好方法,喜怒哀樂你都可以一一見到,而我所見到既,係一堆迷糊既影像(因為非常疲倦)..........

   番到屋企,沖完涼即刻跳上床,喂......乜你晤駛番工咩?冇錯!我今日放假,可以好好休息了...................